الرئيسية » مقالات » أنتي ..

أنتي ..

إلى كل من تحمل صفة ( انتي) مع التحية :

http://youtu.be/2MjBUYfCqeY  

صدفة فر الشوگ
بية ومن لگليتچ..
هذه أنتي
يوم چان الريگ ناشف
جيتي وية الغيمة
وبسكتة مطرتي
هذه انتي

ومن سِمعِت النجمة طاحت
خذتي رخصة من السما
ومنها لمعتي
هذه انتي
انتي ليلة عشگ وتناغي گمرها
انتي غيمة صيف و تداعب مطرها
ونتي من لون السنابل
للمحبة گلادة صغتي
هذه انتي
ونتي ذيچ المنتظرها
وما عرفها .. بلاية موعد
..بس على الموعد اجيتي
وفتحت كل وردة وتفيض بسحرها
وتكتب أعلى الريح قصة من عطرها
ونتي انتي …
للورد فراشة صرتي
هذه انتي

ولاحت الگاع الشمس
وبين اديها توسيديتي
وبين صفنات المطر قوس القزح
غنى دللول وغفيتي
وصبحن بيچ الحدايق
والبلابل
غردتلچ من صحيتي
هذه انتي

ومن سِمعت البسمة تسأل
شنهو انتي
جاوُبَتها الشفة
هذه اللي بسببها مَنمسحتي
هذه انتي
ومن شفت ماي الجداول
بارد ومايه صُفى
لأن وصفچ .. بس كناري
العشگ صوته وِصفّة
وانتي شذرة محبس ولحظة غُوة
والفرات ودجلة من يِجرَن سُوة
وانتي انتي شما نطيتي .. شما اخذتي
ولو رضيتي ولو رفضتي
لو بقيتي ولو رحلتي
تبقي انتي . صورة مرسومة بخيالي .. وهَمسِتّچ رددها صّمتي

هذه انتي