الرئيسية » مقالات » ورقة من صفحات الماضي

ورقة من صفحات الماضي


أبيات تهكمية ساخرة نظمتها في تشرين الاول من عام 2003
يوم كان بريمر حاكما على العراق
ـــــــــــــــــــــــــــــــــــــ
پول بريمر بن علوان
أحلى جميع الشـبّان
***
هذا الصبي كلش حلو
يا ناس فرحو وهلهلو
يعزف على آلة جلو
أعذب وأجمل ألحان
***
پول بريمر أحلى ولد
بالحِسن مثله مَنْوِجد
على المنصه لوصعد
للسحر أصبح عنوان
***
پول بريمر زين وشهم
بـكـل المسائل يفتهم
يرعه المدارس والعلم
يهدي جنط بالمجّان
***
پول بريمر يرعه ألأدب
مَهيوب اصله والنسب
لو تزعجه يگلك شََرَب
بلهجة أبونه ريگان
***
برموري يتغاوه همس
حچيه مثل طعم الدبس
الچلمه يكبسهه كبس
يفتح اذان الطرشان
***
ابن بريمر گول وفعل
لبّسنه بوتين ونعل
حفاي چنّه من قبل
أصبح نصير الحفيان
***
علّّمه المهنه صويحبه
وعلى المكارم درَّبه
يـلّه يخوتي نجربه
نلبس قنادر ألـوان
***
ابن بريمر يغوي النظر
ويشع ضوه مثل الگمر
ينطينه راتب كل شهر
ما خلّه واحد جوعان
***
إنطانه راتب بالعجل
خلصنه من ابو عَجَل
خلانه نحچي بلا خجل
يضمن حقوق الانسان
***
البرمري صاحب فضل
فاحت وروده بكل حقل
برمكي مزيون الأصل
وزع علينه بعــران
***
إنطه حقوق الأرمله
سَهَّل عليهه المشكله
وخلّه الطليقه مدللـه
شبعانه خوخ ورمان
***
وزع مكارم بالعدل
أوجد الكل واحد سِجل
حتى المسودَن والخبل
خصصله راتب تومان
***
بدولار يسندنه سَنَد
عطلتنه جمعه والأحد
يا سَعد كلمن مَنْسِعَد
بريمر دليل الحيران
***
بعد ما نتعشه فجـل
لا نشرب الماي إبسطل
واعدنه بأطياب الأكل
نحشي البطن والمصران
***
موزات كل سبعه بألف
موزه زياده للعِرف
إفرح وغني يا ترف
قضينه على البيتنجان
***
بيريمر أطعمنه نستله
ككو حليب ابو حله
يا هله ويا ميّة هله
صاحت اطفال وصبيان
***
پول بريمر إبن الشعب
مُنقذ بلدنه من الشغب
كرد وتركمان وعرب
فدوه الضحكته قُربان
***
إبن بريمر حامي الجار
من كل بلد جاب انصار
يحمي حمانه والدار
من الأجنبي والجيران
***
عرّفنه بأنواع الخطر
شوَّفنه طسات وحفر
علَّمنه من نمشي بحذر
ناخذ طريق الحيطان
***
پول بريمرصان الحرف
خلَّه الجرايد والصحف
تكتب گلبهه ما يرف
تتحده جور وطغيان
***
للعولمه فتحنه درب
عاشرنه بلغار وصرب
للسلم ننشد لا حرب
نرفض سلوك العدوان
***
حلّ الأمـان إبجيّيته
هَب الفرح صيف وشته
فدوه لعيونه وگذلته
بعد هلـي الأمريكان
***
فدوه رحتله إبمهجتي
اهديله گلبي وچلوتي
بريمر شفالي علتي
بحكمه يداوي التعبان
***
بريمر ابو عيون الزرگ
لو حچه كل حچيه صدگ
ما يوِّد لحظه نفترگ
إحنه وعِمامه خُوّان
***
باقة ورد للبرمري
لا تگول عنّه بربري
شرّبنه شربت أزبري
حَققْ حِلمنه بنيسان
ــــــــــــــــــــــــــــــــــــــــ
حيدر الحيدر
بغداد / تشرين الأول/ 2003