الرئيسية » مقالات » عاجل فرصة لا تفوت احجز تذكرتك فورا على المشروع الخابوري لوزير النقل

عاجل فرصة لا تفوت احجز تذكرتك فورا على المشروع الخابوري لوزير النقل

ولما كان للقصة بقية،، فلقد تصورنا ان عهد بياعين الثلج ونواب الضباط الي يسويهم صدام وزراء قد ولى الى غير رجعة،، ولكن ارادة الله هي الغالبة،، وقد قرأت الخبر التالي ((سكة حديد بين بغداد وباريس :ذكر مصدر في وزارة النقل والمواصلات ان الوزارة فاتحت فرنسا من أجل مد سكة حديد بين بغداد وباريس.واضاف المصدر ان ذلك جاء خلال لقاء وزير النقل والمواصلات عامر عبدا لجبار مع السفير الفرنسي في بغداد، مضيفاً ان الجانب الفرنسي ابدى رغبة كبيرة في اقامة مثل هذا المشروع الحيوي المهم.))،،انتهى الخبر،، الطفل المعجزة وزير النقل والمواصلات تتفق قرائحه الكرويه ويفاتح السفير الفرنسي لمد سكة حديد بغداد – باريس،، وهو امر مشابه لسكة الحديد الموصل-طويرج،،، هو بغداد-اربيل ماكو سكة قطار،، وهنا السيد الوزير يغني للشعب العراقي اغنية ابو مازن ياس خضر الشهيرة مرينا بيكم حمد واحنا بقطار الليل واسمعنا دك أكهوه شمينا ريحة هيل،،،والشعب العراقي يجيب يا ريل صيح بقهر صيحة عشك (عشق) ياريل،، هودر هواهم ولك حدر السنابل كطه. ولك يا سكة حديد بغداد – فرنسا،، هو انت كل الي عندك جم قطار يمشون على تك جرخ، وتسعين بالمية من سكك الحديد اكل عليها الدهر وشرب حتى عربانه يجرها زمال متتحمل مو قطار، ومنين تريد تمد سكة القطار من البو كمال لو من المنذرية لو من طربيل؟؟؟؟، لا اعتقد السيد الوزير رح يمد سكة القطار من الخابور تيمنا بالمشروع الخابوري هذا ،،حقيقة مشروع خابوري اجه بوقته لان المسافرين العراقيين الى فرنسا الي ديخاذون فيز سياحيه خطيه مدتكفيهم الطائرات او الحقيقة العربانات الطائرة للخطوط الجوية العراقية، او احتمال المشروع حيوي لان الفرنسيين قرروا يعوفون الشواطئ الاسبانية ويجون تيشمسون ويه ابو ريشه بالرمادي،، يعني وصل الخمط للهامه،،، يمعودين المستحا راح،، صارت عيني عينك،، وما هذا المشروع الخابوري للسيد وزير النقل والمواصلات الا احد المشاريع التي ستعبي جيوبه ذهبا وتملء قلوب العراقيين قيحاً،،، اني بس عندي سؤال واحد يمعودين اتذكر انه عدنا رئيس وزراء ابو صولات وجولات اسمه المالكي،، وينك مولانا من مشاريع وزير النقل والمواصلات الخابورية،، مو تكول راح تحارب الفساد والمفسدين،،، ديله طكه لوزير النقل والمواصلات وشوفه الباب،،لو هذا السرقة مالته حلال لان محسوب على حزب الدعوة؟؟؟؟،،، والحقيقة هذا المشروع هم بيه وجهة نظر،، يعني يجوز انه هذا المشروع مخصص لوزراء حزب الدعوة ومستشاري رئيس الوزراء والمدراء العامين التابعين لهم وكل خماط بالعراق،، يعني كلشي يصير خاف يطلعون من الحكم بالانتخابات الجايه،، الجماعة محضرين قطار يركبون بيه جماعة والله افلت على فرنسا،، يعني في رأي اذا كانت هذه هي الغاية فالمشروع ممتاز، وعمي حقهم،، لان فليساتهم او بالاصح ملياراتهم نايمه وحدها باوربا تنتظرهم على احر من الجمر، بس السؤال فرنسا كل سكك القطارات مالته على الكهرباء زين شلون اذا مدوا السكك عددنا واحنا ما عدنا كهرباء اصلا شلون رح يمشي القطار،، بس بسيطه هم بس المستشارين عددهم تسعين كل متنكطع الكهرباء ينزلون الجماعة وياخذون دفعه،، وهي شنو كلها يعني شكد الف الفين ثلاثة الاف كيلومتر دفع، سهله مستشارينا اصحاب همه ووزير النقل موجود هم يلكى حل يدبر بغال من المنطقة ويجرون القطار واذا بغال ماتوا على رأي عادل امام فالوزير هو ينزل ويتحمل المسؤولية الى ان يوصلون،،، هجم بيته للفرهود….ولما كان للقصة بقية فترقبوا المزيد.
+كاتب ومتابع عراقي للاحداث.