الرئيسية » مقالات » استراليا ،،بين المستر كوك والشاعر العظيم عفلوك ..!

استراليا ،،بين المستر كوك والشاعر العظيم عفلوك ..!

الله من على استراليا بأن خله مستر كوك يكتشف قيمتها الجغرافية ،وانقطع نسل المكتشفين والعظام باستراليا من مستر كوك الى ان وصل قبل كم سنة مكتشف وشاعر عظيم من اهل الشطرة اسمه عفلوك ..وطبعا قبل ليصعد الطيارة عزلت الاردن ـوالملك راد ينتحر بس كمشته مرته وكالتله استر علينه ،،كالها بعد ان خسرنا الجواهري شلون نخسر عفلوك وتاخذه استراليا ،،ومظفر النواب وعريان سيد خلف جروا نفس لأن جان مدمرهم ،وعفلوك مره راد يبسط عريان لأن قرة قصيدة عالمية وماباس قندرته ..اما الفنانين فكارثة كاظم الساهر طلب لجوء وشرد لدارفور ومحمد عبدة صار بيه بواسير واعتزل الغناء وراشد الماجد كًلب دقلة بالحمام لأن مات الشعر العربي ،بعد ان ركب عفلوك الطيارة ..الموساد داخت والمخابرات الايرانية رادت تغتاله بالسيدة زينب هوة وعلي العيساوي ،،والمخابرات الاميركية عافت اسلحة الدمار الشامل والقاعدة وظلت تدور على اسلحة عفلوك الشعرية الشاملة ،،ومن دخل استراليا الصحافة هاجمته وما انطته حقه لأن هو ماخذ جائزة نوبل بالادب العفلوكي ..والجماهير كلها تموت عليه بسدني وابد ما انطرد من الكهاوي مال فيرفيلد كلها ،،ولا سحلة السيكيورتي وطلعة بحفلة سعدون برة لأن جلب بالسماعة وصار هوة المتعهد وهو ساعة يتوسل حتى يطب بلاش ..وعفلوك ساعة يكول صدام عدم ابوي وساعة يصعد على المنصة ويقرة قصيدة يمدح بيها صدام والبعث ..وخبلك الوادم ماطب مكان الا وصارت مشكلة وثكبت الدنيا ..ومن اهم احلام عفلوك انه واحد يسبه بجريدة حتى يصير مشهور ..بس للأسف ما راح نحققله هاي الامنية لأن احنا نكتب وننقد الشعراء الحقيقيين مو العفالكة ..وثالثا يبوية اذا جريدة العراقية تغار من الشعراء وتكتب عليهم بعثية مثل ما تدعي يا عفلوك ياخوية جان اتهجمنا على الزلم الخشنة بالشعر مثل مكي الربيعي وعزيز الرسام وطالب الدراجي غير ناس محترمين انفسهم ومؤدبين وما ويطفرون مثلك ..ذاك اليوم احد شعرائنا الطيبين بسدني كالي عفلوك اساء لكل الشعراء بسدني باخلاقيته وصور الشعراء العراقيين للناس انهم ناس رعاع ما مؤدبين باخلاقه وتصرفاته يطب للمحلات ويجدي من العالم ، واني جاوبت الاخ الشاعر كتله لا خوية ( كل لشة معلكة من اكراعها ) والناس تميز بين الشعراء والشعارة ,, واذا قشمرله كم صحفي فقير فلازم يكتشفونه يوم ويعرفون عفلوك لاكًف والمفروض انوديه لأقرب مصحة عقلية حتى يتعالج من العقد والامراض ..رسالة اخيرة لشاعر الامة العربية العملاق عفلوك الشطراوي اتهدة بالرحمن وبطل خبالاتك لأن احنا البينه كافينا ،،وثانيا حاول تبدع من صدك وتجيب قصايدك وتفرضها علينا اذا انته صدك مبدع مو بالهوسة والتهمش والكلاوات ثانيا احنا ماعدنا شغل وعمل ونظل نكتب عليك ياخوية ..ثالثا اني احب العراقيين كلهم صدكني روح شوفلك شغلة ياخوية ساعد بيها عائلتك بمكان هوستك وطلايبك اعتذر من الناس الي اسأت الهم حتى يسامحوك والاعتذار فضيلة مابيها شي ..واني مستعد اساعدك بأي شغلة تحتاجها اذا رجعلك عقلك وعفت التهجم على الاخرين من ابناء بلد

طلابة عبد الحسين اوباما والعتوية ..!

اليوم عدنا سويلفة انريد انطكهه طك ,,بطك بعد عمكم ونفلت ،،، اول سوالفنا وصول باراك عبد الحسين اوباما وفوزة بانتخابات امريكا وجلوسة على عرش البيت الابيض للمرة الاولى بتاريخ امريكا ،،وطشت دعاية ان اوباما اصله كيني بس اثبتت دراسة جديدة بثتها جمعية تنبيش الاصل والفصل ،،ان باراك هو ابن حجي عبد الحسين اوباما وحبوبته افطيمة بت عبد علي اوباما جانت تبيع ليف بسوك الزبير ،،فلت حجي عبد الحسين اوباما بعد ان انطلب فصل لأن دعملة عتوي بالبايسكل مالته وانطلب لعشيرة العتوي ،،فركبلة سفينة من ام قصر وفلت ،،وظلت الحجية افطيمه تبيع ليف وتصرف على باقي العائلة ،،كعد حجي عبد الحسين لكه روحة بامريكا ،،شافته بزونة بيضة كالتله خايب شلون تكتل العتوي بالزبير وتفلت اليوم الا افضحك واطلع طراكيعك كالها بوية استري علينه بعد عمج ..اني مستعد اصلح غلطتي واتزوجج ..كالتله اذا السالفة هيج ميخالف ..وفعلا اتزوج حجي عبد الحسين البزونة البيضة وخلفتله اوليد نص عتوي ونص بزون سموه ( باراك) وسبب التسمية يكولك حجي عبد الحسين اوباما عاف مرته حامل وشرد وخلاها معلكه لاهي مطلكة ولاهي على ذمته ,,بيوم الخلفت ابنها اجتها السستر كالتها عدي باد نيوز الج ،،كالتلها ولج شنهي كولي ،، كالتلها حجي عبد الحسين اوباما فلت ويمكن رجع للبصرة ..صاحت بعلو صوتها ماشي يعبد الحسين (براك براك ) يعني ورارك وراك فسموا ابنها ( باراك) ،،افترت الدنيا واذا باراك صار اول رئيس اسيود اصله شروكي لامريكا ،،فقرر اول شغلة يسويها يحرر البصرة من كل العتاوي العبرت الحدود الايرانية ومسلحة بصورايخ عمي نجادي ,,وياخذ ثار ابوه منهم لأن تدرون بعد شردوه وخلوه يفتر بالبلدان ..عمي نجادي من سمع بالطركاعة ودالة رسالة كاله بوية اوباما شنهي السالفة خوية خلينا نتفاهم ،،هسه العتوي الدعمه ابوك الشغلة صارت قديمة ومتنازلين عن الفصل مالته ،، بس خلي عتاوينا شوية تاخذ نفس جا احنا ردناك عون طلعت اوباما ..!! كاله ماكو وحك سيد يوشع خاف عبالكم بوش ..منكًب زفر وكلها تتمردس على بطنه وساكت ،، اني دمي حامي واذا طنكرت لا يفيد وياي نووي ولا كيماوي اخليكم تبيعون (نون خوشك ) يعني خبز يابس بمضيق هرمز وهذني الجم طكاكية العدكم مشوهن على الزعاطيط مال قم بالعيد .

صخم وجهك وصير متعهد حفلات …!

يوم من الايام حجي عبيس جان رجال فقير بالجبايش وداكًة الهبري ،قرر عبيس يشتريلة جيسين طماطة ويفتح بيهن بالسوكً على باب الله ــولله باعهن وحصله جم فلس اخذله بيهن غموس ورد لهيلته ,,ثاني يوم كعد عبيس لكه الجبايش كلها تبيع طماطه ،،كلها غارت من اعبيس شلون ينفع ويشتريله غموس لازم كلها تقلده ،،تالي خوية للعصر خاست الطماطة وانذبت كلها بالزبالة ــلا عبيس نفع ولا اهل الجبايش ربحوا ..شاهد سالفتنا المتعهدين الي بسدني صارت سالفتهم مثل سالفة عبيس ،، بس شافلولهم جم متعهد جابوا هيثم يوسف لو قاسم ونجحت الحفلة وحصلولهم جم فلس ،،فيرفيلد كلها صارت متعهدي حفلات حتى اهل الطماطة والخضورات ..وبالسبوع كام يطبون سدني عشر مطربين ..والعشا خباز ..تطب لحفلة المطرب تلكي عشر نفرات ونصهم طابين بلاش ..اني الي اريد اكوله يا جماعة الخير شغلة المتعهد هي شغلة لازم تكون عد واحد صاحب خبرة يعرف شلون يتعامل وي الجالية ،،من يجيبلة مطرب بحجم ياس خضر لو كاظم الساهر لازم يعرف ان هذا الانسان يمثل الاصالة والفن العراقي لازم يرجع وهو ماخذ انطباع عن العراقيين باستراليا انهم يقدرون الفن وحضروا لحفلته وتفاعلوا وياه بس من يطب المطرب ويلكه عشر نفرات بس المتعهد وعائلته هاي الشغلة عيب والكارثه نص شغلهم قجق يعني اعرف متعهد نص ردن جابله مطرب لا دافع تاكس لا مخبر الدولة كل شغله اتلزك وبيته ليله بفندق وشرده ثاني ليله ،،، من حق كل واحد مادام عدة فلوس يجيبلة مطرب يغنيله ابيته بس المو من حقه ،،من يجيبه ويظل حاط المطرب ويفتر بيه يحشم بالعالم مروتكم بس تعالوا طبوا ولو ابلاش ،،هاي اني اعتبرها اهانة للمطربين الكبار وللجالية بنفس الوقت والسبب انه الشخص المسؤول عن القضية ما عنده خبره وما يعرف شلون يتعامل ويه هيج مواقف لأن مو شغلته اساسا ،،يعني المعلم ما يشتغل بنجرجي والعكس صحيح كلمن اله شغلة ..فيا جماعة الخير استهدوا بالرحمن ولا تفضحونا يااهل الخير وتفشلونه وي مطربينا الكبار ،،اطوا الخبز لخبازته والجالية بيها ناس عدهم خبره كبيره بمجال الحفلات وسووا حفلات ناجحة ،،جا هي شنهي صخم وجهك وصير متعهد حفلات ..!

مدير تحرير جريدة العراقية في سدني