الرئيسية » مقالات » المن تلوك الرئاسة

المن تلوك الرئاسة

للكضة بلندن حياته وما وكع من ايده كاسه

للطلب حق اللجوء وما دره بهموم ناسة

للي ما نام بسواتر والقصف ما وجع راسه

للي ما ضاك الحصار وضيم عشرة سنين ماجاسة

للي ولده بجنة امريكا كضوها اولدنا علفانوس كضوها الدراسه

للي باك وصار بالصدفة معارض وبالحرام انبنه ساسه

جم بطل انولد عدنه ما نعرف اسمه وصارت همومه سياسه

واخر الموديل صاعد اتحيطة دورية وحراسة

وصار مثل الديك يصرخ والرجل كلها نكاسه

كيفت؟ كيفت كلشي تغير ثاري هذا الصار اكبر انتكاسة

الحرامي اليوم صار اكبر مناضل والشريف اعلن افلاسه

والمناصب وزعوها عالكرايب كلمن وحجمه وقياسه

انه اكلك المن تلوك الرئاسة

تلوك للي حضن كاعه وما خذل فد يوم ناسه

تلوك للي فكدت عمود البيت وما باعت شرفهه والركن حطت الطاسه

للكضة عمره يتيم ولارعاه احد ولا زنكين باسه

تلوك للي خسرت ابنها ولا قبر ينزار والدفنه صار بالجياسه

تلوك للعنده عداله وطيب واخلاق وفراسه

ردت انشدك انته يالتقره القصيدة المن تلوك الرئاسة؟

عباس السعيدي