الرئيسية » مقالات » يـاهـلــــي …

يـاهـلــــي …


يــا هلــي …
دخيـل حـوبتكـــم دمعتـــي
مـﮕـبعـــه بفـي الرمـش
تسـاهـر الليــل بغـربتــــي
تتـوسـل الديــره فــرح
يكحـل جفـون الجـــرح
وينـام ليلـــه بليلـــي
……….
يـاهلــي …
دخيــل لمتكــم سـوالف
مـدثـره بنسمــة جنـوب
شـايلـه حسـرة كصــب
بـرهـان عتبهـه
علــى تـاريــخ المظـايف
طـورنــه مـذبـوح ويغنـي حـزن
والغيــــر يطــرب
………
يـاهلــي …
دخيــل بستـان النخــل … عمـاتنـه
تـوم مـزروعـات ويـه جـداتنــه
اطفالهـــن ذبـن رطــب
وحنــه حشـف غـربـه ثمـرنــه
ومــوتنـــه ……
واﮔـف مثـل جــذع النخــل
عـالـي بعلـو تـل المصـايب
مـوتنـــه …..
……….
يـاهلــي ….
دخيــل غفـوتكــم طـويلـــه
اهـل المـﮕـابــر ملـوا وﮔـالـوا
طـويلــــه …
ومــل صبــرهـــم
اشـﮕــد خلـﮓ عنـده صبـركــم
بـاعكــم علاسكــــم
بـاع خيمتكــم جنـوب
بسـوﮓ ذاك الصـوب … بـاعــه
بـرخـص لـو بالـديـن … بـاعـــه
ونتـــم غطـاكــــم شمــس
مــن يــوم امـــس
……..
يـاهلــي …
جيـت حـاســود … شحلاتـه ضيمكــم
مفصـــل مثـل وجـــه المـذلـــه
لايـك عليكـــم
مــو غـريب الفصلـــه
منكـــم وبيكــــم
شـاطــر … مبـارك عليكـــــم
وانـــه اظــل امطـــر دمـــع
وبجــي عليكــم
………
يـا هلـــي …
خــــايف اجيكــــم
ولـﮕـــه ذيـــﭻ نجــومنــــه
الـﭽـانـت يمازحــه الـﮕـمــر
زعـلانـــه منــــه ..
وذاك شطنــه اليرضـع بميـه الزرع
ميــه الـزلال بتعــد عنـــه
وحشــة الديـره عمـه ومـا شـوف دربـي
ضيعـت وانــه بنـزلنـــه
ونـاسنـــــه …
لابســه الغيــره بـرجلهـه
تـعامـــل اللــــه
تـريــد بالـدولار جنـــه
خـايف درابيـن السلـف
تنبــح عليــه ﭽـلابهـه
ومـن بينهــه يعضنــي ﭽـلبنــــه
وهـذا شـوﮔــي
الشـايلــه بصـدري عمـر
محــد يجـي ويـريــد منـــه
……..
يــا هلــي …
تشـوغ روحــي مفرفحـــه
وبـوجوهكـم تضحـك غربتــــي
مـا ادري بيكـم
مـا ادري بالغـربـه وحشتـــي
الغـربـه مــو حـﭽـي بطـران ياهلـي
هــي مـوت يعيـش بيــه
وبيـــه اعيـــش
هـــي عمــري يمــر ﭽــذب
يلـﭽــم البيـــه شمـاتــــه
وﮔــول عمـــري
هيــه شارعهـــم يـﮕـلـــي
شطـولتهــه
ﮔـول مـاعنـدي اهـــل
وﮔــول عنـــدي
………
يـا هلـــي …
شفــت الجنـوب بـابكـــم
مجـــروح بيكـــم
حاضـن التـاريــخ بـردي
ودمعـتــه علـى الخـــد سـؤال
بليلكــم تنـــشد عليكــــم
هيبتـــه تـواكـــح جـــرح
ملـﭽــوم بيكــــم
طيـوره بيـــه مهــاجــره
والسمـﭻ مهضـوم يسـﮕــي الهـور دمعـه
نـاشـف الخـريـط ريجـــه
حـلـف مـا يـرضــع حـلاتـــه الا هلـه
………..
يـاهلــي …
شـوكت نـار الحيـف تلسـع نومكــم
عطـابــه … وتفـزز الغيــره
صـوت الجنـوب يصيحكــم
كـلولـــه عـونــك
شيـلوا مـن عيـونــه الـرمــد
ردوا حلاتـــه..
اسـم اللـه عليــه بلا حـسـد
ﭽـان شحلاتـــه
امـوت بعيـونــه عشـﮓ
وحيـــه بحلاتـــه
آخ يـا بويــه الجنـوب
اشـﮕـــد حلــو
فــــدوه الحلاتـــه

27 / 09 / 2007