الرئيسية » مقالات » سفــرة حلــم

سفــرة حلــم


عبـرت سنيـن فـرﮔـانــه
وجيت انشـد علـى الـدار
نـذرت الـروح اطشنـهـه
لهلـي وللـغـرب والجــار
……..
وﮔـول اهـنـاه
زرعنــه اول فـرح وهنــاه
نصبنـه اول عشـﮒ
واول ولـف صــدنــاه
عـرفنـه الحـب
مــره والحـلــو ضـﮕـنــاه
نـزل عـدنـه الـﮕـمـــر طفيـره لاعبنـاه
وسـرنـه للـنـجـوم علـى السطـح ﮔـلنــاه
حلـم راح وحلـم مـر وسهـرنـه ويـاه
غفـت فـوﮒ الشفـه الضحكـات
جنــه صـغــار ..
كـبـرنـه وطفـت فـرحتنـــه
وكـتـنــه انـــدار …
عبـرت سنين فـرﮔـانـــه …
وجيت انـشــد علـى الـدار
نـذرت الـروح اطشـنـهـه
لهلــي وللـغـرب والجــار
……..
شفتـﭻ بالحـلـم يـاديـرتـي وحنيـت
شلـت شـوﮔـي على ﭼـتف الجرح وتعنيت
امنـي الـروح بالملـﮕــه وﮔـولـن جيـت
اﮔـلـج بـس الـﭻ ريـل وحمـد غنيـت
لـو مال الوكـت ويـاي ونصابيت
هـوه الغبشـه يلـم جـرحـي وفــي البيت
اجيتـﭻ طيف اريـد اتنفـس تـرابـﭻ
ولــو خطــار …
واشكــي الـﭻ
وﮔـلـﭻ هـاكثـر مشتـاﮒ الـﭻ يـا دار
عبـرت اسنين فـرﮔـانـه
وجيت انشــد علـى الـدار
نـذرت الـروح اطشنـهـه
لهلـي وللـغرب والجـار

09 / 12 / 2007

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *